Meistaramót 2015 – föstudagur – úrslit og staða

Í dag föstudag fór fram næst síðasti dagur meistaramóts 2015. Veðrið var betra í dag en í gær, en þó fengu kylfingar að glíma við allar tegundir af veðri – allt frá roki og rigningu til logns og sólskins. 

Í morgun spiluðu meistaraflokkar sinn þriðja hring sem og fyrsti flokkur karla. Þá réðust úrslit hjá drengjaflokki 15 – 18 ára. Eftir hádegi spilaði annar flokkur karla sinn þriðja hring og úrslit réðust í fyrsta flokki kvenna. 

Sjá úrslit í dag og stöðu fyrir lokadaginn hér að neðan. 

Meistaraflokkur kvenna: 

Karlotta Einarsdóttir er með sjö högga forystu fyrir lokahringinn í meistaraflokki kvenna. Karlotta er á níu höggum yfir pari samtals eftir þrjá hringi og á sjö högg á núverandi klúbbmeistara, Helgu Kristínu Einarsdóttur. Helga Kristín Gunnlaugsdóttir er þriðja, Ragna Björg Ingólfsdóttir fjórða og Þyrí Valdimarsdóttir fimmta. 

Meistaraflokkur karla: 

Ólafur Björn Loftsson er með góða forystu fyrir lokahringinn, en hann á níu högg á Odd Óla Jónasson sem er annar. Nökkvi Gunnarsson er þriðji, höggi á eftir Oddi Óla. Steinn Baugur Gunnarsson er fjórði og Dagur Jónasson fimmti. 

1. flokkur karla: 

Spennan er mikil í 1. flokki karla fyrir lokahringinn. Valur Kristjánsson og Eiður Ísak Broddason eru jafnir í efsta sæti á 235 höggum samtals. Hallur Dan Johansen er þriðji á 237 höggum, Kristján Björn Haraldsson fjórði og Hinrik Þráinsson fimmti. Spennandi keppni framundan á morgun laugardag. 

Drengjaflokkur 15 – 18 ára – úrslit: 

Úrslit réðust í drengjaflokki 15-18 ára í dag. Óskar Dagur Hauksson stóð uppi sem sigurvegari eftir að hafa verið í forystu alla dagana. Óskar vann öruggan sigur en hann spilaði á 315 höggum samtals. Sveinn Rúnar Másson varð annar á 341 höggi samtals og Sigurður Örn Einarsson þriðji.  

2. flokkur karla: 

Í öðrum flokki karla er mikil spenna fyrir lokahringinn sem fyrr. Gylfi Geir Guðjónsson er með sex högga foystu fyrir lokahringinn en fá högg skilja menn að í næstu sætum á eftir. Róbert Vinsent Tómasson er annar á 258 höggum, höggi betri en Davíð Kristján Guðmundsson sem er þriðji. Fjórði er Sverrir Briem, þremur höggum á eftir Davíð og Þorkell Helgason fimmti, höggi á eftir Sverri. Spennandi barátta framundan á lokahringnum á morgun. 

1. flokkur kvenna – úrslit: 

Í fyrsta flokki kvenna vann Erla Ýr Kristjánsdóttir nokkuð öruggan sigur, en hún hélt forystu frá fyrsta hring. Hörð barátta var um annað sætið þar sem hin unga og stór efnilega Ragna Kristín Guðbrandsdóttir hafði betur gegn Áslaugu Einarsdóttur á lokahringnum. Tvö högg skildu að lokum þær stöllur að, en Ragna spilaði á 373 höggum samtals og Áslaug á 375 höggum samtals.