Staðan hjá meistaraflokkum og 1. flokki karla fyrir lokahringinn

Meistaraflokkur karla og kvenna og 1. flokkur karla léku þriðja og næst síðasta hringinn á meistaramótinu í dag. Ólafur Björn Loftsson sýndi snilli sína í stutta spilinu í dag þegar hann lék á 64 höggum eða átta höggum undir pari.

Meistaraflokkur karla – staðan

Ólafur Björn Loftsson lék á alls oddi í dag þegar hann lék á 64 höggum. Ólafur fékk einn örn, sjö fugla og einn skolla og sýndi hvers hann er megnugur í stutta spilinu. Ólafur er í forystu fyrirr lokahringinn á samtals 16 höggum undir pari. Annar er Nökkvi Gunnarsson á samtals 11 höggum undir pari og þriðji Oddur Óli Jónasson á 10 höggum undir pari. Oddur Óli lék frábært golf í dag en hann kom inn á 67 höggum. Þessir þrír kylfingar skera sig nokkuð úr því níu högg eru í næsta mann, en Bjartur Logi Finnsson er fjórði á einu höggi undir pari.

1. flokkur karla – staðan

Í fyrsta flokki karla er Kristinn Karl Jónsson með forystu fyrir lokahringinn. Kristinn Karl lék á 75 höggum í dag og hefur leikið hringina þrjá á 5 höggum yfir pari. Flott spilamennska hjá Karli. 10 höggum á eftir Karli er Rósant Freyr Birgisson á 231 höggi samtals og þriðji er Gunnlaugur H Jóhannsson á 232 höggum samtals.

Meistaraflokkur kvenna – staðan

Karlotta Einarsdóttir er með örugga forystu í meistaraflokki kvenna, en það er nokkuð kunnugleg staða fyrir Karlottu.  Karlotta hefur leikið hringina þrjá á 233 höggum, 28 höggum betur en Helga Kristín Gunnlaugsdóttir sem er önnur. Jafnar í þriðja til fjórða sæti eru Helga Kristín Einarsdóttir og Áslaug Einarsdóttir, sjö höggum frá öðru sætinu. Helga Kristín Einarsdóttir spilaði flott golf í dag, 81 högg og 40 punktar. Það er nokkuð mjótt á munum frá öðru til fimmta sætis og því spennandi dagur framundan á morgun.