Helga Kristín Einarsdóttir og Ólafur Björn Loftsson klúbbmeistarar 2013

Það var mikil spenna eins og við var búist á lokadegi 50. meistaramóts Nesklúbbsins. Bráðabana þurfti til að knýja fram úrslit í 1. og 2. flokki karla og í meistaraflokki kvenna réðust úrslit í þriggja holu umspili. Veðrið var kylfingum ekki sérstaklega hagstætt en það hafði ekki mikil áhrif á gæði golfsins sem var oft á tíðum frábært miðað við aðstæður. Úrslit í þeim flokkum er luku leik á laugardag má sjá hér að neðan:

Meistaraflokkur kvenna:

Það var æsispennandi keppni um fyrsta sætið í meistaraflokki kvenna. Fyrir lokaholuna var margfaldur klúbbmeistari, Karlotta Einarsdóttir, með eins höggs forskot á Helgu Kristínu Einarsdóttur. Karlotta sló upphafshögg sitt útaf en fékk fugl á seinni boltann og lék því holuna á samtals fimm höggum. Helga Kristín fékk par og þær luku leik jafnar á 324 höggum samtals. Þriggja holu umspil þurfti til að knýja fram úrslit og þar hafði Helga Kristín betur, hún spilaði holurnar þrjár á pari en Karlotta á einu höggi yfir pari. Glæsilegur sigur hjá Helgu Kristínu og flott barátta hjá þeim báðum. Í þriðja sæti varð Helga Kristín Gunnlaugsdóttir á 340 höggum samtals. 

Meistaraflokkur karla:

Það var minni spenna í meistaraflokki karla þar sem Ólafur Björn Loftsson sigraði með nokkrum yfirburðum. Ólafur Björn var í forystu allan tímann og sigurinn í raun aldrei í hættu, en Ólafur lauk leik á samtals 14 höggum undir pari. Nökkvi Gunnarsson varð annar og lék hringina fjóra á einu höggi undir pari og Oddur Óli Jónasson þriðji á samtals sex höggum yfir pari.

1. flokkur karla: 

Það var mikil spenna í fyrsta flokki karla en þar urðu jafnir í efsta sæti Þórður Ágústsson og Kristinn Arnar Ormsson á 312 höggum samtals. Þórður átti fjögur högg á Kristinn Arnar fyrir lokahringinn en Kristinn Arnar vann þann mun upp. Það þurfti því bráðabana til að fá fram úrslit og þar hafði Þórður Ágústsson betur. Í þriðja sæti varð Arngrímur Benjamínsson á 317 höggum.

2. flokkur karla:

Í öðrum flokki karla stóð Friðrik Jón Arngrímsson uppi sem sigurvegari. Sigur hans var nokkuð öruggur í lokin en hann lék hringina fjóra sjö höggum betur en Þorsteinn Guðjónsson sem varð annar. Jafnir í þriðja til fjórða sæti voru Róbert Vinsent Tómasson og Þorkell Helgason, en Róbert Vinsent hafði betur í bráðabana og hreppti þriðja sætið.