Meistaramót: fimmtudagur

Veðrinu var mjög misskipt milli þeirra kylfinga sem léku fyrir hádegi og hinna sem hófu leik eftir hádegi. Bestu kylfingar Nesklúbbsins voru á ferð eftir hádegi og réðu við aðstæður eins og við var að búast. 

2. flokkur karla hóf leik klukkan sjö í morgun. Nokkuð blés á kylfinga og kalt í veðri, en hlýnaði eftir því sem leið á morguninn. Betra skor var heilt yfir í flokknum enda minni vindur en í gær og aðstæður auðveldari. Sigurður H B Runólfsson hélt forystu sinni í dag en hún minnkaði þó niður í tvö högg. Sigurður hefur leikið hringina tvo á 172 höggum samtals, tveimur höggum minna en Eyjólfur Sigurðsson sem er annar. Jafnir í þriðja til fimmta sæti eru Heimir Örn Herbertsson, Róbert Vinsent Tómasson og Örn Baldursson á 176 höggum. 

1. flokkur kvenna lék einnig fyrir hádegi. Matthildur María Rafnsdóttir heldur forystunni fyrir lokahringinn og er hún orðin nokkuð örugg, eða sjö högg. Erla Ýr Kristjánsdóttir er önnur og Þuríður Halldórsdóttir þriðja. Lokahringurinn hjá fyrsta flokki kvenna verður leikinn á morgun föstudag. 

Meistaraflokkur kvenna hóf leikinn eftir hádegi og fljótlega eftir það fór að rigna. Það hafði þó engin áhrif á spilamennsku okkar bestu kvenkylfinga, því þær náðu mjög góðu skori. Helga Kristín Einarsdóttir er áfram í forystu en hún hefur leikið hringina tvo á 155 höggum. Helga Kristín Gunnlaugsdóttit er önnur á 168 höggum og Sigrún Edda Jónsdóttir þriðja á 175 höggum. 

Það er hörku spenna í fyrsta flokki karla og mikil keppni framundan. Eiður Ísak Broddason er efstur eftir tvo hringi á 163 höggum og jafnir í öðru til fimmta sæti aðeins höggi á eftir Eiði eru Arngrímur Benjamínsson, Einar Þór Gunnlaugsson, Hallur Dan Johansen og Baldur Þór Gunnarsson. Ekki er langt í næstu menn og það verður spennandi að fylgjast með keppni í þessum flokki.  

 Meistaraflokkur karla var næstur í röðinni. Ólafur Björn Loftsson sýndi styrk sinn og spilaði á 68 höggum við frekar erfiðar aðstæður. Með hringnum i dag er hann kominn í forystusætið og á átta högg á Guðmund Örn Arnarson sem er annar. Þriðji er Steinn Baugur Gunnarsson tveimur höggum á eftir Guðmundi. 

Drengjaflokkur 15 – 18 ára ráku lestina í dag og fóru út á eftir meistaraflokki karla. Þessir efnilegu kylfingar voru að spila þriðja og næst síðasta hring sinn í mótinu. Staðan fyrir lokahringinn er þannig að Gunnar Geir Baldursson er efstur á 255 höggum og er með 15 högga forskot fyrir lokahringinn. Sigurður Örn Einarsson er annar og Sverrir Anton Arason þriðji. Fjórði er Arnar Már Heimisson.

Keppni er hálfnuð hjá meistaraflokkum karla og kvenna og 1. og 2. flokki karla, en 1. flokkur kvenna og drengjaflokkur 15 – 18 ára ljúka keppni á morgun. Veðurguðirnir virðast ætla að verða okkur áhagstæðir áfram en það dregur án efa ekkert úr keppniskapinu.