Staða hjá meistaraflokkum og 1. flokki karla

Meistaraflokkur karla og kvenna og 1. flokkur karla léku eftir hádegi í dag. Skor var mjög gott á köflum og einhverjar breytingar á stöðu efstu manna.

Meistaraflokkur kvenna – staðan

Karlotta Einarsdóttir er efst í meistaraflokki kvenna þegar keppni er hálfnuð en hún hefur leikið hringina tvo á 159 höggum. Karlotta lék vel í dag, bætti sig um ellefu högg frá því í gær og fékk m.a. þrjá fugla á fimm síðustu holunum. Í öðru sæti, sjö höggum á eftir Karlottu er Helga Kristín Gunnlaugsdóttir. Helga Kristín lék frábært golf í dag, hringur upp á 77 högg sem skilaði Helgu 44 punktum. Glæsilegur árangur. Í þriðja sæti er Áslaug Einarsdóttir á 176 höggum samtals.

1. flokkur karla – staðan

Kristinn Karl Jónsson er efstur í fyrsta flokki karla þegar keppni er hálfnuð. Kristinn Karl er á samtals 146 höggum, fimm höggum betri en Gunnlaugur H Jóhannsson. Þriðji er Árni Muggur Sigurðsson á 155 höggum samtals.

Meistaraflokkur karla – staðan

Nökkvi Gunnarsson er áfram í forystu hjá meistaraflokki karla þegar keppni er hálfnuð. Nökkvi lék á 70 höggum í dag og hefur leikið hringina tvo á 135 höggum, eða níu höggum undir pari vallar samtals. Annar er Ólafur Björn Loftsson, höggi á eftir Nökkva á 136 höggum samtals, en Ólafur lék á 68 höggum í dag líkt og í gær. Þriðji er Oddur Óli Jónasson á 139 höggum eða fimm höggum undir pari vallar samtals.