Fjórði dagur meistaramóts – úrslit eftir hádegi

Það var úrslitastund í öllum flokkum sem spiluðu eftir hádegi. Veðurguðirnir voru enn og aftur hliðhollir þó aðeins hafi gefið í vindinn frá því um morguninn. 

Úrslit réðust í 3. og 4. flokki karla, 2. og 3. flokki kvenna og Stúlknaflokki 18 ára og yngri. Miklar sviptingar áttu sér stað, frábær tilþrif sáust um víðan völl og spennan mikil á köflum. Sjá úrslit í flokkum hér að neðan. 

3. flokkur karla – úrslit

Miklar sviptingar urðu meðal efstu manna í þriðja flokki karla. Helst bar til tíðinda draumahringur Árna Indriðasonar sem tryggði sér fyrsta sætið með glæsilegum hring upp á 78 högg! Ekki slæmt hjá manni með 16 í vallarforgjöf en þessi frábæri hringur gaf honum 46 punkta. Til hamingju Árni! Í öðru sæti varð Friðþjófur A Árnason sex höggum á eftir Árna og í þriðja sæti varð Björn Jónsson tveimur höggum á eftir Friðþjófi.

4. flokkur karla – úrslit

Gunnar Lúðvíksson tryggði sér sigur í fjórða flokki karla með fínum 35 punkta hring í dag. Gunnar hafði að lokum sex punkta sigur á Ólafi J Straumland sem varð annar en þriðji varð Eggert Benedikt Guðmundsson, punkti á eftir Ólafi.

3. flokkur kvenna – úrslit

Karitas Kjartansdóttir var í forystu frá fyrsta degi í þriðja flokki kvenna og varð að lokum nokkuð öruggur sigurvegari í þriðja flokki kvenna með samtals 134 punkta. Í öðru sæti varð Áslaug Dóra Einarsdóttir og þriðja varð Fjóla Guðrún Friðriksdóttir.

2. flokkur kvenna – úrslit

Jónína Lýðsdóttir hélt forystu frá fyrsta degi, stóðst pressuna og bar sigur úr býtum í öðrum flokki kvenna. Jónína spilaði hringina fjóra á 376 höggum og var 10 höggum betri en Guðrún Valdimarsdóttir sem varð önnur. Þriðja varð Bjargey Aðalsteinsdóttir, höggi lakari en Guðrún.

 Stúlknaflokkur 18 ára og yngri – úrslit

 Salvör Jónsdóttir Ísberg vann góðan sigur í stúlknaflokki 18 ára og yngri. Salvör lék samtals á 285 höggum og var 9 höggum betri en Matthildur María Rafnsdóttir. Þriðja varð Margrét Mjöll Benjamínsdóttir, tveimur höggum á eftir Matthildi.

Hring dagsins átti tvímælalaust Hilda Björk Friðriksdóttir. Hilda spilaði á 97 höggum sem gaf henni 53 punkta! Hilda fékk 47 punkta í gær og því ljóst að forgjöfin hefur lækkað talsvert á meistaramótinu.