Annar dagur meistaramóts – fyrir hádegi

Keppni hélt áfram á 49. meistaramóti Nesklúbbsins í dag sunnudag. Aðstæður voru frábærar og veðurguðirnir keppendum enn hliðhollir. Öldungaflokkar og 2. og 3. flokkur kvenna léku fyrir hádegi, hér að neðan mjá sjá stöðuna að loknum öðrum hring hjá þessum flokkum.

 Karlar 55-69 ára

Eggert Eggertsson er með forystu fyrir lokahringinn í flokki öldunga 55-69 ára. Eggert skilaði öðrum hring upp á 79 högg í dag og hefur tveggja högga forystu á Arngrím Benjamínsson. Jóhann Reynisson er þriðji, höggi á eftir Arngrími og stefnir því í hörkuspennandi lokadag á morgun.

 Karlar 70 ára +

Það voru nokkrar breytingar á röð efstu manna í flokki 70 ára og eldri í dag. Haraldur Kristjánsson hefur spilað stöðugt golf og lyftir sér upp í fyrsta sæti fyrir lokahringinn með öðrum hring upp á 88 högg. Haraldur hefur tveggja högga forskot á Ólaf A. Ólafsson sem aftur á tvö högg á Kristmann Magnússon og Walter Lentz. Hörð barátta framundan á lokahringnum á morgun og ljóst að allt getur gerst.  

Öldungaflokkur kvenna

Kristín Jónsdóttir heldur forystunni í öldungaflokki kvenna fyrir lokahringinn. Kristín hefur fjögurra högga forskot á Rannveigu Laxdal Agnarsdóttur en fjórtán högg skilja svo að Rannveigu og Báru Guðmundsdóttur sem er þriðja.

2. flokkur kvenna

Jónína Lýðsdóttir heldur forystunni að loknum öðrum hring í 2. flokki kvenna og er forskot hennar fjögur högg. Hulda Bjarnadóttir lyfti sér upp í annað sætið með sannkölluðum draumahring, hún spilaði á 89 höggum, bæting upp á 10 högg frá fyrsta hring og 44 punktar. Glæsilegur hringur hjá Huldu! Bjargey Aðalsteinsdóttir er þriðja, sex höggum frá öðru sæti og tíu frá því fyrsta.

3. flokkur kvenna

Karitas Kjartansdóttir heldur forystunni eftir annan dag í þriðja flokki kvenna. Karitas er með nokkuð örugga forystu, hún hefur leikið hringina tvo á 71 punkti samtals, Unnur Halldórsdóttir er önnur á 54 punktum samtals.