Fjórði dagur meistaramóts – úrslit og staða fyrir hádegi

Fjórði dagur meistaramóts fór vel af stað í morgun í blíðskaparveðri en logn og blíða tók á móti keppendum. Um miðjan morgun kom hressileg demba sem var sannarlega þörf á og tóku allir henni fagnandi og létu ekki hafa áhrfi á spilamennskuna. 

Úrslit réðust í unglingaflokki drengja 14 ára og yngri en þar hafði Gunnar Geir Baldursson sigur en hann var í forystu alla dagana. Gunnar Geir spilaði jafnt og gott golf og vann að lokum með 13 högga mun. Glæsilegt hjá Gunnari. 

Drengir 15 – 18 ára 
Eiður Ísak Broddason er efstur eftir fyrsta hring í flokki drengja 15-18 ára. Eiður Ísak spilaði á 76 höggum og er með sex högga forskot á Eggert Rafn Sighvatsson. Sigurður Örn Einarsson er þriðji, tveimur höggum lakari en Eggert, en Sigurður spilaði á 84 höggum.

Drengir 14 ára og yngri – úrslit
Eins og áður sagði þá bar Gunnar Geir Baldursson sigur úr býtum í flokki 14 ára og yngri eftir að hafa spilað frábært golf alla dagana. Gunnar Geir lék hringina á 81, 81 og 82 höggum, samtals á 244 höggum. Dagur Logi Jónsson varð annar á 257 höggum samtals og tveimur höggum á eftir Degi og í þriðja sæti varð Sindri Már Friðriksson á 259 höggum samtals.  

1. flokkur kvenna
Sigrún Edda Jónsdóttir er með forystu í fyrsta flokki kvenna eftir fyrsta hring, en hún spilaði frábært golf í dag. Sigrún Edda spilaði á 81 höggi sem skilaði henni 42 punktum – glæsilegur hringur. Erla Ýr Kristjánsdóttir er önnur á 90 höggum og jafnar í þriðja til fimmta sæti eru Oddný Rósa Halldórsdóttir, Jónína Birna Sigmarsdóttir og Jórunn Þóra Sigurðardóttir, allar á 93 höggum.