Meistaramót: laugardagur

Í dag laugardag fór fram lokadagur meistaramóts Nesklúbbsins 2014. Mikil spenna var fyrir lokahringinn í flestum flokkum og hélst hún alveg fram á lokaholur þegar úrslit voru ljós. 

2. flokkur karla fór út snemma í morgunsárið. Þar var keppni mjög hörð og margir kylfingar sem áttu möguleika á verðlaunasæti. Þegar upp var staðið höfðu orðið sætaskipti í öllum verðlaunasætum og þurfti bráðabana til að skera úr um 2. sætið. Þar áttust við Eyjólfur Sigurðsson og Björgólfur Jóhannsson. Þar fóru leikar þannig að Eyjólfur hafði betur á fyrstu holu bráðabana og lenti í öðru sæti. Þess má geta að Málfríði, eiginkonu Björfgólfs, hafði dreymt fyrir þriðja sætinu síðastliðna nótt, en Björgólfur vill reyndar frekar kenna mistökum kylfusveinsins um að hafa ekki náð öðru sætinu. Líklega verður deilt um þetta mál eitthvað fram eftir sumri. 

Í fyrsta flokki karla var einnig mikil keppni og úrslit langt í frá ráðin fyrir lokahringinn. Þar var það enda einnig svo að sætaskipti urðu í öllum verðlaunasætum. Hallur Dan Johansen spilaði best allra í dag á 79 höggum og tryggði sér sigur með góðum hring. Hallur spilaði á samtals 319 höggum, þremur höggum betur en Einar Þór Gunnlaugsson sem varð annar. Eiður Ísak Broddason varð þriðji á 324 höggum. 

Í meistaraflokki kvenna má segja að úrslit hafi verið ráðin, allavega hvað varðar fyrsta og annað sætið. Klúbbmeistarinn frá því í fyrra, Helga Kristín Einarsdóttir, var með gott forskot í fyrsta sæti frá fyrsta degi og hélt því til leiksloka. Helga spilaði hringina þrá á 306 höggum, þrettán höggum betur en nafna hennar Helga Kristín Gunnlaugsdóttir sem varð önnur. 

Í meistaraflokki karla má einnig segja að úrslit hafi verið nánast ráðin, allavega hvað fyrsta sætið varðar. Ólafur Björn Loftsson fór inn í lokahringinn með 11 högga forskot og ljóst að hann myndi ekki láta það af hendi. Sú varð raunin og Ólafur spilaði best allra í dag á 67 höggum og sigraði nokkuð örugglega. Ólafur Björn spilaði hringina fjóra á 279 höggum. Guðmundur Örn Árnason varð annar á 293 höggum samtals, en Guðmundur Örn spilaði gott og stöðugt golf alla dagana og átti næst best skor dagsins, 70 högg. Þriðji varð Oddur Óli Jónasson á 299 höggum. 

Vel heppnuðu meistaramóti er nú lokið. Þó að veðrið hafi strítt okkur kylfingum þá var það hvergi nærri eins slæmt og óttast var og mátti á köflum ekki á milli sjá hvort að norska eða íslenska veðurspáin hafi verið vitlausari.

Sjáumst öll að ári!